تحيا مصر

يا شباب ثورة يناير
يا مفتتين جبال
الخوف
تركمت الساحة للطامع
والارزقى واللى على
السلطة
ملهوف
ده حبل المؤامرات انفتل
واتنصبت مشانق
بالصفوف
والماسونية نفثت سمومها
فى عقول شباب
مهفوف
والطبور الخامس جهز
والقتلى ح يبقوا
بالالوف
يا مشعللين الحروق
ومفجرين قنابل
الملتوف
يا مخربين البلاد
من اجل حفنة
سفوف
يا معتصمين فى الميدان
من غير سبب
معروف
يا كل صحفى مأجور
يا كل اعلامى مأفون
الشعب منكم بقى
مقروف
مصر دى أمنا
وجيشها بعون
اللـــه
محفوظ
وازاى ح تقابلوا
ربنــــا
بضمير ميت ووش
مكشــوف
دى دنيــأ فانيا
واحنا فوق ترابها
ضيــوف

فينك يا مصرى

حكومة بلدنا حكومة هــش فــش
حكومة وديعة لا بتهـش ولا بتنش
وأى ثورجى يقلب ليهم سحنة الوش
تلقى رئيس الحكومة يرتعش ويكش
كل زير على كرسيه ساقع ومشبر وفرش
واديله بقين كلام م هو كله هتش ونتش
وثوار الميدان ماسكين ليهم صفارة الكوتش
وزير يقعد والتانى يمشى وده مايكملش
زير فرفور وزير أمور وزير كبش بن كبش
ببكى عليكى يا مصر بس الدمع ما بينزلش
ولادك خلوا طريقك كله حجارة ودبش
وكل واحد فاكر ان غيره غبى ما بيفهمش
والنسوان ذى عبقريته لسه ما انجبتش
ولادك دول يا مصر؟ولا ولاد كمبورة المفش
فينك يا سعد وليه يا ناصر ليه مابتقمش
دى مصر عايزه ولد جسور مقدام مابيخفش
ايد يمدها للسلام والتانيه جاهزه للطش
ياترى المصرى ده موجود؟ولالسه ماأتولش

التـــــــــــار ولا العـــــــــــار

التار ولا العار ولو كان القتيل حمار

شعار رفعوه فى الصعيد

قتلوا بيه الشيخ والوليد

وحرقوا الاخضر واليابس

ونسيوا بيه حقوق الجار

التار ولا العار ولو كان القتيل حمار

رصاص بيحصد رؤس

ونفوس بتقتل نفوس

ويتامى تبكى اللى راح

وارامل تشكى المرار

التار ولا العار ولو كان القتيل حمار

العقول ركبها الشيطان

والصدور مليتها النيران

وشفايف بتنفث سموم

تولع فى الميه نار

التار ولا العار ولو كان القتيل حمار

لا علم نافع فيكم

ولا الكتاب بيهديكم

ونقضتم عهد المودة

وجريتم الدم انهار

التار ولا العار ولو كان القتيل حمار

التار د عادة جاهلية

لا فى اسلام ولا مسيحية

ونسيتم ان للكون اله

وفيه حساب وجنة ونار

التار ولا العار ولو كان القتيل حمار

المولى قالها فى علاه

ولكم فى القصاص حياة

وخصها باصحاب العقول

امحوا الشر من الافكار

التار ولا العار ولو كان القتيل حمار

ح تاخد ليه تارك بايدك

سيب حقك لسيدى وسيدك

د ربنا اسمه الغفور الرحيم

زى م اسمه المنتقم الجبار

لا تار ولا عار وسامح يا عبد الغفار