التـــــــــــار ولا العـــــــــــار

التار ولا العار ولو كان القتيل حمار

شعار رفعوه فى الصعيد

قتلوا بيه الشيخ والوليد

وحرقوا الاخضر واليابس

ونسيوا بيه حقوق الجار

التار ولا العار ولو كان القتيل حمار

رصاص بيحصد رؤس

ونفوس بتقتل نفوس

ويتامى تبكى اللى راح

وارامل تشكى المرار

التار ولا العار ولو كان القتيل حمار

العقول ركبها الشيطان

والصدور مليتها النيران

وشفايف بتنفث سموم

تولع فى الميه نار

التار ولا العار ولو كان القتيل حمار

لا علم نافع فيكم

ولا الكتاب بيهديكم

ونقضتم عهد المودة

وجريتم الدم انهار

التار ولا العار ولو كان القتيل حمار

التار د عادة جاهلية

لا فى اسلام ولا مسيحية

ونسيتم ان للكون اله

وفيه حساب وجنة ونار

التار ولا العار ولو كان القتيل حمار

المولى قالها فى علاه

ولكم فى القصاص حياة

وخصها باصحاب العقول

امحوا الشر من الافكار

التار ولا العار ولو كان القتيل حمار

ح تاخد ليه تارك بايدك

سيب حقك لسيدى وسيدك

د ربنا اسمه الغفور الرحيم

زى م اسمه المنتقم الجبار

لا تار ولا عار وسامح يا عبد الغفار

رباعيات فلفول
ابويا يوم قاللى---اسمع منى ياابنى---من سار على الدرب وصل
مراتى سمعته---ازاى فهمته؟!!!!!!!!!!---وعديكم ع اللى حصل
مسكت العصايا--- وفى الشقة جرى ورايا---وفين يوجعك يا عم
اتاريها كانت عايزه--- ترفع مستوايا--- وابقى راجل مهم....
...................................................................................................
حبيبى شكله حلو--- لكن لسانه مر
يصبحنى بتكشيرة---ويمسينى بامشى انجر
وان ضحك فى وشى يوم!!!
يبقى ناوى على الشر.....
.................................................................................................
حبيبى وزنه تقيل--- وحجمة فشر الفيل
ان حبيته دفعة واحدة--- افطس واصبح قتيل
قسمته على دفعات--- فى اليوم تلات مرات
وعلشان اتحمل حبه--- باخد له مقويات