أنا كنت ماشى يا خواتى
قابلنى خروف فلاتى
فروة سودة وليه تمام
قلت له على فين ياسى خرخر
شايفك ماشى بتتمخطر
قاللى مواعد نعجة جنان
ح ناكل فول على شعيره
ونروح مع بعض الحظيرة
وح نلعب هناك النطة كمان
أصل العيب مش عيبك
د عيب المعلم اللى سابك
أرجع لأخلى يومك قطران
لازم ياخروف ندبحوك
بس الأول راح نخصوك
أحسن تملأ البلد خرفان
حكم وقالها كبير القطيع
علشان ما تبقى خروف مطيع
كل حشيش وعيش التوهان
اللى معانا ده مسلم صح
واللى علينا يندبح دبح
وده شعارنا على طول الزمان
الصدق دايما ما تقولوش
والكدب حبيبك ما تسيبوش
لغيرك يفرح وتبات زعلان
أياك تستعمل عقلك يوم
تركبك كوابيس طبق اليوم
وتشوف نفسك مسلوق فى أزان
ومهما اقول واعيد وياك
كأنى بأدن فى مالطه معاك
يا أنت أهبل ياراكبك الجنان
