لا عصمة الا لنبى

ليه كل كلمة عندك معركة وبتدخليهــــــا

ولازم وحتما تكونى المنتصرة فيهــــــــا

لو كل الناس حاربت ف الدنيا بعضيهـــا

قولى ع الدنيا السلام وبلاش نعيش فيهـــا

الدنيا كده هات وخد والناس للناس تلاقيها

ومحدش يقدر لوحده يعيش يا روحى فيهــا

دى معاملة الناس فنون لازم ولابد تتقنيهــــا

وزى م لينا لسان الناس يا روحى لسان ليها

لا بقول لك طاطى راسك ولا عينك اكسريها

الكلمة الطيبة صدقة ح تكسبى لو قلتيهـــــــــا

الناس صنوف وانواع فيها دهب وفيهـــــــــا

فيه ناس ف العين تنشال وناس تانيه بنرميها

وناس قلبها طيب لكن عقلها مش فيهــــــــــــا

تحدف الكلمة وعمرها م تحسب حساب ليهـــا

و دى بالذوق افهمها مش بالتعالى عليهـــــــــا

ولو بايد اقرصها ايدى التانية اطيب بيهــــــــا

وفيه ناس كلمتهم حلوة والمر دايب فيهـــــــــا

دى ناس اشترى منها وعمرى م ابيع ليهــــــا

وفيه ناس خبيثة لئيمة تزيد الكلمة وتطويهــــا

ودى من بعيد نسمعها ولا نعلقش عليهـــــــــا

وناس بغبغنات تردد كل كلمة تقوليهـــــــــــــا

ودى اعمل الف حساب وانا قدامها باحكيهــــا

وناس كلمتهم سيف صوت الحق واضح فيهــا

دى ناس من دهب خالص عمرى م افرط فيها

وكلمة حق راح اقولها ارجوك بقى افهميهـــا

كل الناس خطاءه ولا معصوم الا النبى فيهــا