وقفت اتفرج على نفسى…..فى مرايا عندى من زمان
لقيت وشى لسه مأطأط…..والصحة كده تمام التمام
حطيت بارفام وكالونيا…..وصبغت شعرى بنى كمان
وقعدت ع القهوة اتغندر…..ابحلق لى فى كام فستان
وفى بقى لبانة باندغها…..م انا اصلى واد اولعبان
عدت قدامى السنيورة…..الوش يا هوه قمر الزمان
والعود لفته لفة تجن…..عواجيز جنبى وزى شبان
مشيت وراها وانا مبلم…..سايقنى حسنها الفتان
وف ايدى عصايتى بلفلفها…..دى ياما وقعت نسوان
فتحت خطوتها كده شويه…..فتحت وراها الخطوه كمان
بس يا خسارة يا رجليا…..الروماتيزم ماسكك من زمان
وقعت ع الأرض اتخبط…..اشكى م الألم والنهجان
بصت لى السنيورة وضحكتها…..قطعت ف قلبى العيان
قوم خد يا جدو اللى وقع منك…..بصيت لقيته طقم الشنان
ليست هناك تعليقات:
إرسال تعليق